Саха сиригэр Ийэ күнүн көрсө, алтынньы 15 күнүгэр, күнүс 15:00 чааска, «Алгыс» сынньалаҥ киингэр, ийэлэрбитигэр анаан олус туһалаах тэрээһин – «Оҕуруот аһын олордуу, харайыы» маастар-кылааһа ыытылынна.

Бу тэрээһини уопуттаах оҕуруоччут Анна Дмитриевна Ушницкая бэйэтин баай уопутугар олоҕуран, сэргэхтик, интэриэһинэйдик ыытта. Истэ кэлбит дьүөгэлэрин бэйэтэ үүннэрбит арбуһунан, дынятынан күндүлээтэ. Ийэлэрбит оҕуруот аһын үүннэриигэ саҥа ньымалары билэн, сүбэлэри ылан, хомуллубут оҕуруот аһын хайдах сатабыллаахтык харайарга үөрэннилэр.
Бу маастар-кылаас дьиэ кэргэн сөпкө астанан-үөллэнэн доруобуйатын тупсарынарыгар улахан кылаат буолар. Анна Дмитриевна көрдөһүүбүтүн ылынан оҕуруот олордуутугар баай билиитин уонна уопуттун үллэстибитин иһин истиҥ махталбытын тиэрдэбит! Кини сыралаах үлэтэ элбэх дьоҥҥо туһалаах буоллун.